काठमाडौं-नेपाल राष्ट्र बैंकले कर्णाली विकास बैंकलाई समस्याग्रस्त घोषणा गरेको छ। नेपाल राष्ट्र बैंकको बुधबार बसेको सञ्चालक समितिले बैंकलाई समस्याग्रस्त घोषणा गरेको हो।
अर्को व्यवस्था नभएसम्मका लागि राष्ट्र बैंकले कर्णाली विकास बैंकलाई नियन्त्रणमा लिने भएको छ। राष्ट्र बैंक ऐनको दफा ८६ (ग) बमोजिम बैंकलाई नियन्त्रणमा लिएको हो।

कर्णाली विकास बैंकको व्यवस्थापन सञ्चालनका लागि राष्ट्र बैंकले बैंक वित्तीय संस्था नियमन विभागको उपनिर्देशक टीकाराम खतिवडाको संयोजकत्वमा तीन सदस्यीय व्यवस्थापन समूह गठन गरेको छ।

वित्तीय संस्था सुपरिवेक्षण विभागका विष्णुकुमार विश्वकर्मा र कानून महाशाखाका उपनिर्देशक किशोर कुशवाहालाई सदस्य तोकिएको छ। समूहले पुस ११ बाट बैंकको जिम्मेवारी समाल्ने छ।

व्यवस्थापन समूहले सर्वसाधारणको हित तथा अधिकारको संरक्षण गर्दै बचत भुक्तानी र संस्थाको ऋण असुलीलाई प्राथमिकता राख्ने बताइएको छ।

यस्तै बैंकको ‘डियु डेलिजेन्स’ सम्पन्न गराउन आवश्यक कार्य गर्नुका साथै वित्तीय अपचलनउपर आवश्यक छानबिन गरी कानूनी प्रकृयामा ल्याउने बताइएको छ।

कर्णाली विकास बैंकले राष्ट्र बैंकले तोकेबमोजिम न्यूनतम पुँजीकोष अनुपात कायम गर्न सकेको थिएन। बैंकको निष्कृय कर्जा बढेर ४०.८५ प्रतिशत पुगेका थियो।

कर्णाली डेभलपमेन्ट बैंक समस्याग्रस्त घोषणा गरेसँगै सेयर कारोबार भोलि बिहीबारबाटै रोकिने भएको छ। राष्ट्र बैंकको सञ्चालक समितिले कर्णाली डेभलमेन्ट बैंकलाई समस्याग्रस्त घोषणा गरेसँगै कारोबार रोक्का गर्नका लागि नेपाल स्टक एक्सचेन्जमा पत्र पठाएको छ।

नेप्सेमा ८७० रुपैयाँ प्रतिकित्ता सेयर कारोबार भइरहेको छ। विगतमा पनि राष्ट्र बैंकले समस्याग्रस्त घोषणा गरेका बैंकहरुको कारोबार रोक्का गरेको थियो। नेपाल बंगलादेश बैंक, नेपाल सेयर मार्केट्स, नेपाल फाइनान्स कम्पनी, नेपाल मर्चेन्ट बैंक लगायतका बैंकहरुलाई समस्याग्रस्त घोषणा गर्दै सेयर कारोबार रोक्का गरेका थियो।